बुलढाणा : (एशिया मंच न्यूज )
जिल्ह्यात विनापरवाना झाडांची मोठया प्रमाणात अवैध कत्तल होत असून वाहतूक सुरू आहे. सदर हे अवैध तोडलेल्या लाकडाची सर्रासपणे मध्यप्रदेश येथील बुरहानपुरला येथे नेल्या जातो. अशाच एक लाकडाची अवैध वाहतूक करणारा ट्रक मोताळा तालुक्यात वन कर्मचाऱ्यांनी पकडला असून याप्रकरणी वन गुन्हा दाखल करण्यात आला.
याबाबत प्राप्त माहिती अशी की, मोताळा वनपरिक्षेत्र अंतर्गत येणाऱ्या धामणगाव परिसरातून लाकडाची अवैध वाहतूक येत असल्याची गुप्त माहिती मोताळा वन कर्मचाऱ्यांना मिळाली असता त्यांनी 5 डिसेंबरच्या सायंकाळी खांडवी ते ब्राह्मणदा रोडवर वनपाल पी.एम. नारखडे, वनरक्षक के.एन. तराळ पाळत ठेऊन विनापरवाना लाकूड वाहतूक करीत असताना ट्रक क्र.MH-43 U-3794 याला पकडले. सदर ट्रक व जळतन लाकडे जप्त करून मोताळा वनपरिक्षेत्र कार्यालय मोताळा येथे ठेवण्यात आले आहे. सदर ट्रक मध्ये मोहा, निम, बेहडा अश्या प्रजातीचे जळतन होते. या कारवाईत एकूण 4 लाख 75 हजाराचा मुद्देमाल जप्त करण्यात आले असून वनगुन्हा दाखल करण्यात आला आहे.
