* तहसीलदार विठ्ठल कुमरे यांनी पकडला अवैध वाहतूक करणारा टिप्पर
बुलढाणा : (एशिया मंच न्यूज )
मुदत संपलेल्या रॉयल्टीच्या आधारावर अवैध वाळू वाहतूक करणारे वाहन २१ नोव्हेंबर रोजी रात्री तहसीलदार विठ्ठल कुमरे यांनी पकडले. संबधित मालकावर दंडात्मक कारवाई करण्यात आली असून टिप्पर बुलढाणा शहर पोलीस ठाण्यात जमा करण्यात आले. वाळू माफियांना माफी नाही, जणू असा इशाराच तहसीलदारांनी यामाध्यमातून दिला.
जिल्ह्यात दोन प्रमुख नद्या आहेत. घाटाखालच्या भागात "पूर्णा" तर घाटावरील भागात "खडकपूर्णा" नदी वाहते. याच दोन नद्यामध्ये वाळू माफियांचे साम्राज्य पसरलेले आहे. जिल्हाधिकारी डॉ. किरण पाटील यांनी वाळू माफिया विरोधात कडक भूमिका घेतल्यानंतर घाटावरील भागात वाळू वाहतुकीला लगाम लागल्याचे दिसत आहे. मात्र घाटाखालील वाळू माफिया बेफाम झालेले आहे. इतकंच नव्हे तर जिल्हा मुख्यालय असलेल्या बुलढाणा शहरात देखील घाटाखालून टिप्परद्वारे वाळूची अवैध वाहतूक सुरू आहे. शुक्रवारी कडाक्याच्या थंडीत मध्यरात्री २ वाजेच्या सुमारास बुलडाणा तहसीलदार विठ्ठल कुमरे व चालक अशोक देवकर हे गस्तीवर होते. मलकापूर रोडवरील रिलायन्स मॉलसमोर त्यांनी एका मिनी टिप्परला (क्र. एमएच- १९, सीएक्स-२८९५) थांबवून चालक गोकुळ कांडेलकर याला विचारपूस केली. त्याने सदर टिप्पर संजय रायबोले (रा. मलकापूर) यांचे असून बुऱ्हानपूर (मध्यप्रदेश) घाटाची वाहतूक मुदत संपलेली रॉयल्टी दाखवली. त्यामुळे हे टिप्पर जप्त करून बुलढाणा शहर ठाण्यात जमा करण्यात आले. मालकावर दंडात्मक कारवाई करणार, अशी माहिती तहसीलदार विठ्ठल कुमरे यांनी आज २२ नोव्हेंबर रोजी दुपारी दिली. बुलडाणा शहरात अवैध वाळू वाहतूक करताना कोणी आढळले तर कडक कारवाई करण्यात येईल, असा इशारा देखील त्यांनी दिला आहे.
