* पोलीस अधीक्षक निलेश तांबे यांच्याहस्ते शाल-श्रीफळ व भेटवस्तू प्रदान करून गौरव
बुलढाणा : (एशिया मंच न्युज)
बुलढाणा पोलीस दलाच्या नियत वयोमानानुसार सेवानिवृत्त झालेल्या पोलीस अधिकारी व अंमलदारांचा सन्मान करण्याचा एक आगळावेगळा उपक्रम पोलीस विभागाच्या वतीने 30 जून रोजी राबविण्यात आला. या कार्यक्रमात पोलीस अधीक्षक निलेश तांबे यांच्याहस्ते निवृत्त होत असलेल्या अधिकारी व कर्मचाऱ्यांना शाल, श्रीफळ व सन्मानचिन्ह देऊन त्यांच्या दीर्घकालीन सेवेचा सन्मान करण्यात आला.
कार्यक्रमात पोलीस अधीक्षक तांबे यांनी आपल्या मनोगतातून, निवृत्त होणाऱ्या सर्व अधिकारी व अंमलदारांच्या कर्तव्यनिष्ठ सेवेस सलाम करत, त्यांच्या कुटुंबीयांचेही विशेष कौतुक केले. पुढे बोलतांना ते म्हणाले की, पोलीस सेवा ही अत्यंत हुशारी व जबाबदारीची आहे. वर्षानुवर्षे कर्तव्य पार पाडत अनेक संकटांना तोंड देत आपण सर्वांनी समाजातील कायदा-सुव्यवस्थेसाठी अत्यंत मोलाची भूमिका बजावली आहे.
या कार्यक्रमाला जिल्ह्यातील वरिष्ठ पोलीस अधिकारी, विविध विभागांचे प्रमुख, कर्मचारी तसेच निवृत्त अधिकारी व त्यांच्या परिवारातील सदस्य उपस्थित असल्याने तो क्षण एक गौरवमय वातावरणात संपन्न झाला.
कार्यक्रमाच्या शेवटी निवृत्त अधिकारी व अंमलदारांनीही आपल्या भावना व्यक्त करत पोलीस दलातील आप-आपले अनुभव व्यक्त करीत काहींनी डोळ्यातून अश्रू अनावर करत पोलीस दलाबाबत कृतज्ञता व्यक्त केली. हा कार्यक्रम म्हणजे एक सुंदर स्नेहसंमेलनाचा क्षण ठरला, जिथे अनुभव, सन्मान व स्नेह या तिन्हींचा मिलाफ पाहायला मिळाला.
