शेत मजूरावर बिबट्याचा हल्ला
* देऊळघाट परिसरातील घटना
नेहमी प्रमाणे शेतात काम करण्यासाठी जात असलेल्या एका शेत मजूरावर बिबट्याने अचानक हल्ला करून जखमी केल्याची घटना २ डिसेंबर २०२३ रोजी सकाळी ११ वाजेच्या सुमारास बिरसिंगपूर शिवारात घडली. जखमी शेत मजूरावर सध्या बुलढाणा जिल्हा सामान्य रुग्णालयात उपचार करण्यात येत आहे.
याबाबत मिळालेली माहिती अशी की, राजू बाबुराव सोनुने वय ३० रा. बिरसिंगपूर असे जखमी असलेल्या शेत मजुराचे नाव आहे. बुलढाणा-देऊळघाट मार्गाला लागून दलाल यांचे शेत आहे. या परिसरात असलेला बिबट्या दडा मारून बसलेला होता. राजू सोनुने हे शेतात कामासाठी जात असताना बिबट्याने झुडपातून बाहेर येत त्यांच्यावर अचानक झडप घालत त्यांना जखमी केले. या अचानक झालेल्या या हल्ल्यामुळे राजू सोनुने यांनी आरडा- ओरड केली असल्यामुळे परिसरात असलेल्या शेतात काम करणाऱ्या लोकांनी घटनास्थळाकडे धाव घेत यादरम्यान झालेल्या गोंधळ व आवाजाने बिबट्याने तेथून पळ काढला. या हल्ल्यात जखमी झालेल्या सोनुने यांना बुलढाणा जिल्हा सामान्य रुग्णालयात उपचार करण्यासाठी दाखल करण्यात आले.
बिबट्याने हल्ला केल्याची माहिती मिळाल्यानंतर वन विभागाच्या कर्मचाऱ्यांनी जिल्हा सामान्य रुग्णालयात पोहोचून जखमीची विचारपूस करत घटनेची सविस्तर माहिती जाणून घेतली. सोबतच आरएफओ अभिजित ठाकरे यांनी पथकासह घटनास्थळ गाठत पंचनामा केला. दुसरीकडे या परिसरात बिबट्ट्याचा वावर असल्याचे स्पष्ट झाल्यामुळे नागरिकांमध्ये भितीचे वातावरण आहे. यावर वनविभागाने उपाय योजना करावे, अशी परीसरातील नागरिकांची जोर धरत आहे.
