* तिघांना अटक
बुलडाणा : (एशिया मंच वृत्त)
श्रीमंत होण्यासाठी चुकीच्या मार्गाचा अवलंब करणार्‍या तिघांना दिल्लीत आयबी ने अटक केली. अटक करण्यात आलेले तिघेही बुलडाणा शहरातील रहिवासी असल्याचे समोर आल्यानंतर तिघा आरोपींना बुलडाणा स्थानिक गुन्हे शाखेच्या ताब्यात देण्यात आले.
त्यांच्या चौकशीतून धक्कादायक माहिती समोर आली असून श्रीमंत होण्यासाठी बुलडाणा अर्बनचे संस्थापक राधेश्याम चांडक आणि मलकापूर विधानसभा मतदारसंघाचे माजी आमदार चैनसुख संचेती यांना अपहरण करण्याचा प्लॅन तिघांनी रचल्याचे समोर आले. बुलडाणा शहर पोलिस स्टेशनचे ठाणेदार प्रल्हाद काटकर यांनी माहिती दिली आहे.
सदर प्लॅन मध्ये बुलडाणा शहरातील मिर्झा आवेज बेग (21), शेक साकीब शेख अन्वर (20), उबेद खान शेर खान (20) अशी अटक करण्यात आलेल्यांची नावे असून ते बुलडाणा शहरातील शेर-ए-अली चौकातील राहणारे आहेत. तिघेही काही दिवसापूर्वी दर्शनाकरिता अजमेर येथे गेले होते. बेरोजगारीला कंटाळून त्यांनी श्रीमंत होण्याचा योजना आखली. बँक लुटण्यासाठी त्यांनी एक एअर गन विकत घेतली. बँक लुटल्यानंतर कार खरेदी करायची, ऑफिस बनवायचे आणि एखाद्या श्रीमंत व्यक्तीला अपहरण करून कोट्यवधी रुपये कमवायचे अशी योजना त्यांची होती. दरम्यान दिल्लीत आयबी पोलिसांनी या प्रकरणाची माहिती देऊन त्यांना बुलडाणा पोलिसांच्या ताब्यांत दिले. चौकशी दरम्यान राधेश्याम चांडक, माजी आमदार चैनसुख संचेती यांना अपहरण करण्याचा त्यांचा प्लॅन होता असे त्यांनी पोलिसांनी सांगितले. पोलिसांनी त्यांना अटक करून बुलडाणा शहर पोलिसांनी प्रतिबंधात्मक कारवाई केली आहे.
