बुलढाण्यात शिवसेनेचा मेळावा
* विधान परिषदेचे विरोधी पक्षनेते ना. दानवे करणार मार्गदर्शन
* पदाधिकारी व कार्यकर्त्यांनी उपस्थित रहावे - जालिंधर बुधवत
बुलढाणा : (एशिया मंच वृत्त)
विधान परिषदेचे विरोधी पक्षनेतेपदी अंबादास दानवे यांच्यावर शिवसेना पक्षप्रमुख उद्धवसाहेब ठाकरे यांनी जबाबदारी सोपवली असून या निमित्ताने बुलढाणा जिल्हा शिवसेनेच्या वतीने त्यांचा सत्कार करण्यात येणार आहे. तसेच त्यांच्या प्रमुख मार्गदर्शनाखाली पदाधिकारी व कार्यकर्त्यांचा मेळावा बुलढाणा येथे आयोजित करण्यात आला आहे. १६ सप्टेंबर रोजी होणाऱ्या या मेळाव्याला जिल्ह्यातील शिवसेना पदाधिकारी व कार्यकर्त्यांनी उपस्थित रहावे असे आवाहन जिल्हाप्रमुख जालिंदर बुधवत व जिल्हाप्रमुख वसंतराव भोजने यांनी संयुक्तरीत्या केले आहे.
शिवसेना ही सत्तेसाठी नव्हे तर समाजासाठी आहे. जिल्ह्यात अधिक जोमाने शिवसेना संघटन मजबूत करण्यासह येणाऱ्या कार्यकर्त्यांच्या निवडणुकीमध्ये त्यांना उभारी मिळावी या दृष्टिकोनातून पदाधिकारी व कार्यकर्त्यांचा मेळावा शुक्रवार १६ सप्टेंबर 2022 रोजी गर्दे सभागृहात सकाळी ११ वाजता आयोजित करण्यात आला आहे. विधान परिषदेचे विरोधी पक्षनेते ना. अंबादास दानवे यावेळी मार्गदर्शन करणार आहेत. यावेळी जिल्हा संपर्कप्रमुख प्राध्यापक नरेंद्र खेडेकर, सहसंपर्कप्रमुख दत्ता पाटील, भास्करराव मोरे, छगनराव मेहेत्रे, महिला आघाडी जिल्हाप्रमुख चंदाताई बढे यांच्यासह जिल्ह्यातील शिवसेना, युवासेना, महिला आघाडीचे पदाधिकारी प्रमुख उपस्थित राहणार आहेत. या सत्कार सोहळा व मेळाव्यासाठी शिवसेना अंगीकृत संघटनांच्या सर्व पदाधिकाऱ्यांनी व कार्यकर्त्यांनी उपस्थित रहावे, असे आवाहन शिवसेना जिल्हाप्रमुख जालिंदर बुधवत व जिल्हाप्रमुख वसंतराव भोजने यांनी केले आहे.
