* गजानन राठोड यांच्या यशाची प्रेरणादायी कहाणी!
बुलढाणा : (एशिया मंच न्यूज )
ग्रामीण भागातील तरुणांनी स्पर्धा परीक्षेकडे केवळ नोकरी मिळविण्याचे साधन म्हणून न पाहता, सातत्य, मेहनत आणि जिद्दीच्या जोरावर मोठी झेप घेता येते, हे सिद्ध करणारी प्रेरणादायी कामगिरी डोंगर खंडाळा येथील गजानन राठोड यांनी करून दाखविली आहे. तब्बल सहा वर्षांच्या संघर्षानंतर त्यांनी विविध शासकीय सेवांमध्ये सात वेळा यश संपादन केले आहे.
गजानन राठोड यांची नुकतीच महाराष्ट्र लोकसेवा आयोगामार्फत (MPSC) इन्स्पेक्टर स्टेट टॅक्स (STI) तसेच पोलीस सब-इन्स्पेक्टर (PSI) वर्ग-२ अधिकारी पदासाठी निवड झाली आहे. विशेष म्हणजे, त्यांच्या या यशामागे सहा वर्षांचा अथक अभ्यास, अपयशातून शिकण्याची वृत्ती आणि सातत्यपूर्ण प्रयत्नांची मोठी भूमिका आहे.
राठोड यांच्या शासकीय सेवेत यशाची सुरुवात भारतीय पोस्टमध्ये 2017 साली झाली. त्यानंतर इंडियन रेल्वेमध्ये 2028, दिल्ली पोलिसमध्ये 2021 अशी महत्त्वाची यशाची मालिका त्यांनी कायम ठेवली. पुढे आरोग्य सेवक पदावर 2023 मध्ये 50 टक्के प्रवर्गातून तसेच 2024 मध्ये 40 टक्के प्रवर्गातून त्यांनी यश मिळविले. आता MPSCच्या माध्यमातून STI आणि PSI पदांसाठी निवड झाल्याने त्यांच्या यशाला आणखी मोठे वलय प्राप्त झाले आहे.
एकाच व्यक्तीने विविध विभागांतील एवढ्या शासकीय पदांवर निवड होण्याची कामगिरी करणे ही निश्चितच उल्लेखनीय बाब मानली जात आहे. विशेषतः ग्रामीण भागातील विद्यार्थ्यांसाठी गजानन राठोड यांचा प्रवास प्रेरणादायी ठरणारा आहे. त्यांच्या या यशाबद्दल कुटुंबीय, मित्रपरिवार, शिक्षक, मार्गदर्शक आणि ग्रामस्थांकडून अभिनंदनाचा वर्षाव होत आहे. त्यांच्या यशाच्या गौरवार्थ काढण्यात आलेल्या अभिनंदन फलकावरही त्यांच्या विविध शासकीय सेवांतील निवडींचा उल्लेख करण्यात आला आहे.
सहा वर्षांचा संघर्ष, सात सरकारी नोकऱ्या हा त्यांचा प्रवास केवळ यशाची आकडेवारी नसून, स्पर्धा परीक्षेची तयारी करणाऱ्या हजारो तरुणांसाठी जिद्द, संयम आणि सातत्याचा संदेश देणारा आहे. परिस्थिती कोणतीही असो, ध्येय निश्चित असेल आणि त्यासाठी सातत्याने प्रयत्न केले तर यश मिळविता येते, हे गजानन राठोड यांनी आपल्या कामगिरीतून दाखवून दिले आहे. त्यांच्या या उल्लेखनीय यशामुळे परिसरातील तरुणांमध्येही स्पर्धा परीक्षेबाबत नवी उमेद निर्माण झाली असून, गजानन राठोड यांचा संघर्षमय प्रवास अनेकांसाठी यशाची प्रेरणादायी कहाणी ठरत आहे.
