जुन्या भांडणातून वाद विकोपाला; चाकूने पोटावर वार
* माळीपुऱ्यातील घटनेत सोमेश डांगे गंभीर जखमी ; जालना येथे अतिदक्षता विभागात उपचार सुरू
-----------------------
देऊळगाव राजा : (एशिया मंच न्यूज )
जुन्या भांडणाच्या कारणावरून झालेल्या वादाचे पर्यवसान चाकूहल्ल्यात झाल्याची घटना देऊळगाव राजा शहरातील माळीपुरा परिसरात घडली. वादादरम्यान तरुणाच्या पोटावर चाकूने वार करून त्याला गंभीर जखमी केल्याचा आरोप आहे. या घटनेत सोमेश प्रणयकांत डांगे (वय २८, रा. माळीपुरा, देऊळगाव राजा) गंभीर जखमी झाले असून, त्यांच्यावर जालना येथील कलावती हॉस्पिटलच्या अतिदक्षता विभागात उपचार सुरू आहेत. या घटनेमुळे परिसरात खळबळ उडाली आहे.
या प्रकरणी प्रणयकांत श्रीराम डांगे (वय ६६, व्यवसाय खासगी नोकरी, रा. माळीपुरा, देऊळगाव राजा) यांनी देऊळगाव राजा पोलिस ठाण्यात तक्रार दाखल केली. त्यांच्या तक्रारीवरून केतन विजय तिडके (रा. माळीपुरा, देऊळगाव राजा) याच्याविरुद्ध भारतीय न्याय संहिता (BNS) कलम १०९(१) अन्वये गुन्हा दाखल करण्यात आला आहे.
जुन्या वादातून चाकूहल्ला
पोलिसांनी दिलेल्या माहितीनुसार, २ ऑक्टोबर २०२६ रोजी सकाळी ९.४५ वाजण्यापूर्वी माळीपुरा परिसरात ही घटना घडली. जुन्या भांडणाच्या कारणावरून केतन तिडके याचा सोमेश डांगे यांच्यासोबत वाद झाला. वादाचे रूपांतर हाणामारीत झाले. त्यानंतर आरोपीने जवळील चाकूने सोमेश डांगे यांच्या पोटावर वार केल्याचे फिर्यादीत नमूद करण्यात आले आहे.
या हल्ल्यात सोमेश डांगे गंभीर जखमी झाले. त्यांना उपचारासाठी सुरुवातीला स्थानिक रुग्णालयात दाखल करण्यात आले. प्रकृती गंभीर असल्याने पुढील उपचारासाठी त्यांना जालना येथील कलावती हॉस्पिटलमध्ये हलविण्यात आले. सध्या त्यांच्यावर अतिदक्षता विभागात उपचार सुरू आहेत.
* घटनेच्या दुसऱ्या दिवशी गुन्हा दाखल
घटनेनंतर फिर्यादी प्रणयकांत डांगे यांनी दिलेल्या तोंडी रिपोर्टवरून ३ ऑक्टोबर २०२६ रोजी सायंकाळी ५.०५ वाजता देऊळगाव राजा पोलिस ठाण्यात गुन्हा दाखल करण्यात आला.
या प्रकरणाचा पुढील तपास पोलीस उपनिरीक्षक नितीन मिंड करीत आहेत. गुन्हा दाखल करण्याची कार्यवाही पोलीस उपनिरीक्षक मोहन गिते यांनी केली. पोलिसांकडून घटनेचा पुढील तपास सुरू आहे.
