* केंद्रीयमंत्री प्रतापराव जाधव यांनी केली केंद्रीय सांस्कृतिक व पर्यटन मंत्री गजेंद्र सिंह शेखावत यांच्याकडे मागणी
बुलढाणा : (एशिया मंच न्यूज )
जगप्रसिद्ध लोणार सरोवर येथे असलेल्या धारातीर्थ गोमुख धारेखाली भाविकांना श्रावण मासानिमित्त कावड जलस्त्रोत घेऊन जाण्यासाठी, भाविकांना अंघोळ करण्यासाठी हे स्थळ खुलं करावे, अशी मागणी केंद्रीय आयुष ,आरोग्य व कुटुंब कल्याण राज्यमंत्री प्रतापराव जाधव यांनी केंद्रीय सांस्कृतिक आणि पर्यटक मंत्री गजेंद्र सिंग शेखावत यांच्याकडे केली आहे
बुलढाणा जिल्ह्यातील लोणार येथे उल्कापातामुळे सरोवराची निर्मिती झाली आहे. हे जगातील तिसरे खाऱ्या पाण्याचे सरोवर म्हणून त्याची ओळख आहे, हे सरोवर बुलढाणा लोकसभा मतदार संघांमध्ये येत असून जिल्ह्याच्या वैभवाच्या, धार्मिक अध्यात्मिक दृष्टिकोनातून महत्वपूर्ण आहे. लोणार सरोवर परिसरामध्ये धारातीर्थ गोमुख ही भाविकांसाठी श्रद्धेचे ठिकाण आहे. या गोमुखाततुन पडणाऱ्या पाण्याखाली अनेक भाविक श्रावण मासात अंघोळ करत असतात परंतु कोरोनाच्या काळामध्ये लागलेल्या निर्बंधमुळे या गोमुखा खाली अंघोळ करण्यास बंदी घालण्यात आली होती. कोरोनाचा प्रादुर्भाव संपल्यानंतर ही या गोमुखाच्या धारेखाली अंघोळ करण्यास मनाई करण्यात आलेली आहे. अनेक भाविकांचे श्रद्धास्थान असलेले हे गोमुख स्थळ श्रावण मासानिमित्त भाविकांच्या अंघोळीसाठी, जलस्त्रोत नेण्यासाठी खुलं करावे, अशी मागणी पर्यटन सांस्कृतिक आणि पर्यटनमंत्री गजेंद्र सिंग शेखावत यांच्याकडे केंद्रीय आयुष आरोग्य व कुटुंब कल्याण राज्यमंत्री प्रतापराव जाधव यांनी केली आहे .
