खामगाव : (एशिया मंच वृत्त)
मालक नसतानाही भूखंड खरेदीचा सौदा करून अडीच लाखाने फसवणूक केल्याप्रकरणी येथील दोघांविरुद्ध शहर पोलिसांनी गुन्हा दाखल केला. या घटनेमुळे शहरात एकच खळबळ उडाली आहे.
याबाबत स्थानिक जलालपुरा येथील जय देवेंद्र वस्तानी यांनी शहर पोलिस स्टेशनला दिलेल्या तक्रारीत नमूद केले की, लक्ष्मण विश्वनाथ वराडे (रा. समर्थ नगर) आणि पंकज सीताराम घोरपडे (रा. गजानन कॉलनी, शेगाव) या दोघांनी त्यांच्या मालकीचा भूखंड नसतानाही ताज नगरला लागून असलेले कविश्वर यांच्या ले-आऊटमधील शेत सर्व्हे नं. १४४/ ३ मधील प्लॉट नंबर ४७ क्षेत्रफळ ३०० चौरस मीटरचा व्यवहार १९ नोव्हेंबर २०२२ रोजी केला. हा व्यवहार १० लाख ३२ हजार ९६० रुपयांत झाला होता. या व्यवहाराच्या इसारापोटी २ लाख ५० हजार रुपये दोघांनाही दिले.
व्यवहारात ठरल्याप्रमाणे भूखंड खरेदी करून देण्याबाबत वस्तानी यांनी वराडे व घोरपडे यांना विचारणा केली असता दोघांनी हा प्लॉट आमच्या नावे नसून तुमचे पैसे परत करत असल्याचे सांगितले. मात्र त्यानंतर वेळोवेळी उडवाउडवीची उत्तरे देत फसवणूक केल्याचा आरोप जय वस्तानी यांनी शहर पोलिस स्टेशनला दिलेल्या तक्रारीत म्हटले आहे. या तक्रारीवरून शहर पाेलिसांनी आरोपी लक्ष्मण विश्वनाथ वराडे आणि पंकज घाेरपडे या दोघांविरोधात भादंवि कलम ४०६, ४६७, ४६८, ४७०, ४७१ भादंविचा गुन्हा दाखल केला आहे. पुढील तपास शहर पोलीस निरीक्षक शांतीकुमार पाटील करीत आहे.
